नांदगाव पाटीजवळ कारची मोटार सायकलला धडक,एक ठार एक गंभीर जखमी

चाकूरः-12 मार्च /मधुकर कांबळे
नांदगाव पाटीजवळ कार व मोटार सायकलमध्ये झालेल्या अपघातात कारची मोटार सायकलला जोराची धडक बसल्याने यात मोटारसायकल चालकाचा मृत्यू झाला असून पाठीमागे बसलेली महिला गंभीररित्या जखमी झाल्याची घटना आज बुधवार दि.12 मार्च रोजी सकाळी साडेअकरा वाजण्याच्या सुमारास घडली आहे.
याबाबत मिळालेली अधिक माहिती अशी की, चाकूर तालुक्यातील शिवणखेड येथील एक दांपत्य मोटारसायकल (क्र.एम.एच.24 आर 1862) वरून नळेगाव येथे लग्न सोहळ्यास जात होते. यावेळी नांदगाव पाटीजवळ कार (क्र.एम. एच.43 डी.9035 ) ने दुचाकीला जोराची धडक दिली. यात दुचाकीस्वार विश्वनाथ केशव काटे ( वय वर्ष 50)व त्यांच्या पत्नी सुनंदा विश्वनाथ काटे (वय वर्ष 45 )हे गंभीररित्या जखमी झाले. या दोन्ही जखमीना लातूर येथील शासकीय रुग्णालयात उपचारासाठी दाखल करण्यात आले. मात्र विश्वनाथ काटे यांचा लातूर येथे रुग्णालयात उपचारादरम्यान मृत्यू झाला. त्यांच्या पत्नी सुनंदा काटे या गंभीर जखमी झाल्या असून त्यांचा पाय फॅक्चर झाला आहे.त्यांच्यावर लातूर येथील खासगी रुग्णालयात उपचार सुरु आहेत.
या अपघाताची माहिती मिळताच राष्ट्रीय महामार्ग रुग्णवाहीका व चाकूर पोलीस घटनास्थळी तात्काळ पोहचले. त्यांनी दोन्ही जखमीना उपचारासाठी तातडीने लातूर येथील शासकीय रुग्णालयात दाखल केले. मात्र दुर्दैवाने उपचारादारम्यान विश्वनाथ काटे यांचा मृत्यू झाला. उद्या सकाळी शिवणखेड येथे त्यांच्या पार्थिवावर अंत्यसंस्कार केले जाणार आहेत.यामुळे शिवणखेड गावावर शोककळा पसरली आहे.विश्वनाथ काटे यांच्या पश्चात आईवडील, पत्नी, चार मुली, एक मुलगा, एक भाऊ व दोन बहिणी असा परिवार आहे .