अहमदपूरात मतदान अधिकारी व कर्मचाऱ्यांचे पहिले प्रशिक्षण संपन्न , 2400 कर्मचाऱ्यांनी घेतले प्रशिक्षण

चाकूर : 28 ऑक्टोबर /मधुकर कांबळे
राज्यात 20 नोव्हेंबर 2024 रोजी होणाऱ्या विधानसभा निवडणुकीच्या अनुषंगाने काल रविवार दि.27 ऑक्टोबर 2024 रोजी अहमदपूर येथील प्रसाद गार्डन मंगल कार्यालयात (236)अहमदपूर विधानसभा मतदार संघातील केंद्राध्यक्ष,मतदान अधिकारी व कर्मचारी यांचे पहिले प्रशिक्षण पार पडले.
या प्रशिक्षणात अहमदपूर विधानसभा मतदार संघाच्या निवडणूक निर्णय अधिकारी तथा अहमदपूरच्या उप विभागीय अधिकारी मंजुषा लटपटे यांनी सर्व अधिकारी व कर्मचारी यांना निवडणूक कामाबाबत सखोल मार्गदर्शन केले. यावेळी सहाय्यक निवडणूक निर्णय अधिकारी उज्वला पांगारकर व चाकूरचे तहसीलदार नरसिंग जाधव यांची प्रमुख उपस्थिती होती. तसेच क्षेत्रीय अधिकारी व महसूल विभागातील अधिकारी कर्मचारी उपस्थित होते.
प्रशिक्षणार्थी मतदान अधिकारी कर्मचाऱ्यांसाठी मतदान यंत्राचे प्रशिक्षण (हॅण्डस ऑन ट्रेनिंग) महात्मा गांधी महाविद्यालयात आयोजित करण्यात आले होते.मतदान यंत्र कसे हाताळावे याची सविस्तर माहिती मास्टर ट्रेनर यांनी प्रात्यक्षिकद्वारे दिली.सदरील प्रशिक्षण दोन सत्रात घेण्यात आले. अहमदपूर चाकूर तालुक्यातील 2400 कर्मचाऱ्यांना प्रशिक्षण देण्यात आले.